O pasado xoves, 26 de marzo, viveuse un momento moi especial na nosa biblioteca escolar. Tivemos o pracer de recibir a María e Antía, de 2º C e 2º A, que se uniron para contarnos unha das historias máis fermosas da literatura infantil: "¿A que sabe a lúa?".
Cunha lectura moi ensaiada e chea de entusiasmo, as nosas contacontos fóronnos presentando a todos os animais que, un a un, foron rubindo uns enriba dos outros para tentar acadar o satélite. María e Antía conseguiron que todos os presentes estivésemos pendentes de se, por fin, o león, o elefante ou o pequeno rato lograrían darlle un bocado á lúa.
Máis alá da historia, o que realmente nos emocionou foi ver a colaboración entre as dúas compañeiras de segundo e como nos lembraron que, traballando en equipo, ata os obxectivos que parecen máis lonxanos poden estar ao noso alcance.
Non vos perdades o vídeo! Aquí podedes ver o ben que o fixeron María e Antía e descubrir, por fin, cal é o sabor da lúa:
Moitas grazas, María e Antía, por este agasallo en forma de conto e por facernos pasar un xoves tan máxico na biblioteca!
