Mans á obra en 3º D: Preparando o noso Maio!

Como xa sabedes, a creación do noso Maio escolar foi un auténtico éxito grazas á colaboración de todo o colexio. Hoxe queremos facer unha parada moi especial para ver como traballou a aula de 3º D, que puxo toda a súa enerxía e ilusión nesta tradición.

Os nenos e nenas de terceiro tiveron unha misión moi importante e recendente: preparar as vistosas cadenetas de laranxas e limóns que enchen de cor e alegría a nosa estrutura. Cun manexo fantástico do fío e a agulla (e con moito coidado!), demostraron un gran traballo en equipo, axudándose uns a outros para que ningunha froita quedase fóra.

Da gusto ver o implicados que están os nosos alumnos e alumnas á hora de manter vivas as nosas festas populares. ¡O resultado salta á vista!

Queres ver como se converteu a clase nun obradoiro de primavera? Non te perdas este fantástico vídeo que recolle os momentos máis divertidos de 3º D preparando o Maio:

Moitas grazas a toda a clase de 3º D polo voso esforzo e por encher o cole de cor e bo arrecendo! Sodes uns artistas!

¡Aí vén o Maio! Unha obra de arte feita por todo o colexio

Hoxe, xoves 7 de maio, a entrada do noso centro loce máis fermosa que nunca grazas á creación do noso Maio escolar. Esta actividade foi o broche de ouro a días de traballo nos que participou absolutamente todo o alumnado, dende os máis pequenos ata os máis maiores.

A elaboración foi un verdadeiro exemplo de traballo en equipo e repartición de tarefas:

• 1º e 2º de Primaria: Os máis pequenos encargáronse de preparar con moito coidado as tradicionais cadenetas de pampillos.

• 3º e 4º de Primaria: Traballaron arreo ensartando as vistosas cadenetas de laranxas e limóns que lle dan ese colorido e recendo tan especial ao noso Maio.

• 5º e 6º de Primaria: Foron os encargados de preparar as cadenetas de ovos.

• Alumnado de 6º: Ademais, os nosos veteranos tiveron o traballo extra de montar e dar forma a toda a estrutura, poñendo toda a súa dedicación para que quedase así de impoñente.

Unha vez rematada a montaxe, toda a comunidade educativa baixou á entrada para recibir á primavera como manda a tradición: uníndonos nunha soa voz para cantar "Aí vén o maio". Foi un momento emocionante ver o froito da colaboración de todos e todas presidindo a entrada do CEP Ventín.

Queres ver como foi o proceso e o resultado final? Non te perdas o vídeo e as fotos que recollen o esforzo e a alegría de todo o alumnado durante o día de hoxe: 

Tin e Tina celebran os Maios na biblioteca

Coa chegada do mes de maio, as nosas mascotas Tin e Tina vestíronse de gala para celebrar as nosas tradicións. Entre flores, loureiros e cintas de cores, os nosos amigos verdes convídannos a descubrir as coplas e historias que gardan este mes.

Tin e Tina van de maios,

verdes coma o loureiro en flor,

na biblioteca de Ventín

gardan contos con moito amor.

Non deixedes de pasar a visitar este recuncho tan primaveral e cheo de "Crónicas do Pasado"!

 Felices Maios a todas e todos!

Os Maios

O equipo ACES continúa coa programación das actividades. Nesta ocasión o noso famoso MAIO.
Grazas a todo o alumnado pola aportación do material e elaboración das cadenetas  e grazas especiais ao noso alumnado de sexto que axudou a facelo.
Por suposto tamén a Mila, Bea e David.
Continuamos!!!!

 

 

MÁIS MAIOS 2021

O alumnado de 5º D elaborou uns pequenos maios e cantou unhas coplas feitas por eles.

Dáselles moi ben!!!

Tamén os nenos e nenas de 1º B queren compartir con nós as súas coplas, que cantan así de ben!

O NOSO MAIO 2021

O mes de maio é un mes de celebracións!

Como non nos quixemos esquencer dos Maios, e aquí vos mostramos os noso, que está ben acompañado por outros máis pequenos pero igual de bonitos, elaborados por algúns compañeiros.

Grazas por compartilos!

CELEBRANDO OS MAIOS

O alumnado de 6º C celebrou os Maios... desde a casa!

Agardamos desfrutedes do seu traballo feito con moito agarimo para todos vós.

Premede na imaxe para velo.

Coplas creadas polos nenos e nenas de 6º C e

tema musical "Aí ven o Maio" de Mar Davila e Genma Lareo

Gustavo, de 3º tamén o quixo celebrar e compartir con nós. Premede na imaxe para escoitar as súas coplas.

Grazas a todos!!!

MAIOS 2019

A semana pasada estivemos de celebracións. Non só festexamos as Letras Galegas, os Maios tamén tiveron a súa festa no noso cole!

Foi un festexo do máis colaborativo, xa que coa aportación de todos, construímos un maio e unha alfombra fantásticos.

Uns recolleron fiúncho, outros trouxeron laranxas e limóns, uns formaron cadeas de flores, outros trouxeron ovos... e todos, todos, elaboraron montóns de flores de papel coas que fixemos a nosa alfombra floral.

E non quedou aí a cousa.

Tamén houbo cancións relacionadas coa tradición dos Maios, entre elas, unhas coplas compostas entre todos, nas que cada nivel ten a súa estrofa.

 

Máis fotos aquí.

FESTEXAMOS AS LETRAS E OS MAIOS

O mes de maio é mes de celebracións.
Dos tradicionais Maios, e tamén das Letras Galegas, que nós celebramos de xeito conxunto.

E para a ocasión fixemos un maio, tivemos xogos tradicionais, un precioso festival, no que varios nenos do cole nos deleitaron coas súas interpretacións, cantamos o himno galego e bailamos a muiñeira, e ata un concerto de Paco Nogueira!

Deste último poderedes ver algo noutra entrada, esta reservámola para os nosos artistas.

Mirade, mirade...

A semana das Letras Galegas foi única no CEP de Ventín, non só puidemos coñecer un pouco máis a vida e a obra de Carlos Casares, se non que celebramos os maios.

Aquí vos deixamos a cantarela deste ano elaborada polo alumnado do centro.

CANTARELA DO MAIO

Os rapaces de Ventín

imos celebrar os Maios,

conservando tradicións

dos nosos antepasados.

(Retrouso) 

Cantamos todos xuntos?                  

Cantamos si señor!               

Celebramos o Maio                   

Con moita ilusión.

Con moita ilusión.

Con moita ilusión.                  

Cantamos todos xuntos?

Cantamos si señor!

Xa está chegando o Maio,

xa está chegando aquí,

non  deixedes de cantalo,

non deixedes de aplaudir.

(Retrouso)

Aí ven o Maio florido,

chega ao cole de Ventín,

para alegrar aos nenos,

coas flores dos seus xardíns!

(Retrouso)

Nos Maios aquí en Ventín,

poderás ti descubrir,

moitos bailes e cancións

para disfrutar e rir.

(Retrouso)

O Maio chegou coas flores,

e máis con Carlos Casares,

as letriñas van bailando,

mentres facemos cantares.

(Retrouso)

O maio no Milladoiro,

ten pampillos e máis flores.

Cando os nenos van cantando

brillan todas esas cores.

A continuación podedes ver tamén, un anaquiño da celebración.

Letras Galegas e Maios - Kizoa Editar Videos - Movie Maker